Web Development
شنو يعني موقع ويب؟
قبل ما ندخل بالتفاصيل التقنية، خلي نتفق على الأساس. الموقع هو برنامج يشتغل بالمتصفح (Browser) مثل Chrome أو Safari. الفرق الجوهري بينه وبين تطبيق الموبايل هو إن الموقع ما يحتاج "تنصيب" بجهازك ولا ياخذ مساحة من ذاكرتك، ولا يطلب منك تحديثات كل يومين. هو مجرد رابط (URL) توصله بضغطة زر من أي مكان بالعالم.
الويب هو الأداة الأقوى للوصول للجمهور العالمي مباشرة. لما تبني موقع، أنت تملك المنصة 100%. ماكو "حراس بوابة" يمنعوك من النشر أو يفرضون عليك قوانين معقدة مثل متاجر التطبيقات. أنت تكتب الكود، تشتري الدومين، وبضغطة زر واحدة (Publish) صار مشروعك متاح لكل البشرية.
هذا الاتصال المباشر بينك وبين الناس هو القوة الحقيقية لتطوير الويب؛ حيث تضمن استقلالية مشروعك وصوتك بعيداً عن تحكم الخوارزميات أو سياسات الشركات الخارجية.
من شنو يتكون الموقع؟
أي موقع بالدنيا، مهما كان معقد، يتكون من ثلاث شغلات أساسية تشتغل سوية:
- HTML (الهيكل): يمثل العظم وتقسيمات الصفحة.
- CSS (المظهر): يمثل الشكل، الألوان، والترتيب.
- JavaScript (الروح): هو اللي ينطي التفاعل والمنطق للموقع.
ملاحظة: بـ 2026 صارت المواقع عبارة عن تطبيقات ويب ذكية (Web Apps) تكدر تسوي بيها كلشي: من البيع والشراء إلى أدوات التصميم والذكاء الاصطناعي.
الويب: عالم مليء بالتحديات (Reality Check)
تطوير الويب يبدأ بشكل ممتع وسهل؛ تكدر تكتب HTML و CSS وتطلع نتيجة حلوة بساعة، وهذا اللي يخلي الكثير يحبون المجال. لكن التحدي الحقيقي يبدأ لما تبني أنظمة (Full-stack Systems) متكاملة.
إحنا هنا ما دنحجي بس عن عرض صور، دنحجي عن أنظمة تدير شركات ومخازن عملاقة، أو منصات SaaS معقدة تشتغل بداخل المتصفح بسلاسة. هذا يتطلب جهد هندسي لضمان تحمل قواعد البيانات لملايين الطلبات، وتأمين البيانات الحساسة، والتعامل مع المدفوعات بشكل احترافي. الويب مجال يتدرج من البساطة إلى أعقد الهندسات البرمجية.
ليش تتعلم تطوير المواقع؟
مجال الويب هو أكثر مجال مطلوب ومستقر تقنياً في سوقنا الحالي، وسبب هذا الشيء هو:
- تشتغل من أي مكان: تكدر تشتغل Freelance ويه شركات بره العراق وأنت كاعد ببيتك، أو تشتغل بشركات محلية.
- السرعة بالتنفيذ: تكدر تبني فكرة مشروعك (Startup) بسرعة وبأقل تكاليف.
- مجتمع عملاق: المصادر التعليمية متوفرة بكثرة وأي مشكلة تواجهك راح تلكى مبرمجين حاليها قبلك.
- تعدد المسارات: الويب يفتحلك باب للتخصص بالواجهات، بالبيانات، أو الاثنين معاً (Full-stack).
التشريح الحقيقي للموقع (Frontend vs Backend)
أي موقع يتكون من جزئين أساسيين:
1. الواجهة الأمامية (Frontend)
هذا الجزء اللي يشوفه ويستخدمه الشخص. يشمل الألوان، الخطوط، الصور، وتفاعل العناصر بداخل الشاشة.
2. الواجهة الخلفية (Backend)
هذا هو "العقل" اللي يشتغل ورا الكواليس. مسؤول عن قواعد البيانات، تسجيل الحسابات، وتأمين العمليات المنطقية للموقع.
المطور اللي يضبط الجزئين سوية يسمى Full-stack Developer،
شلون أبدأ؟
مجال الويب واسع، وأفضل طريقة حتى ما تضيع هي التركيز على التطبيق العملي:
- ابدأ بالبناء فوراً: لا تكتفي بمشاهدة الكورسات. أي شي تتعلمه، طبقه بمشروع صغير (حتى لو بسيط جداً)، وشوف شلون ترفع موقعك حتى تشاركة ويه الناس.
- اضبط الأساسيات: تعلم HTML, CSS, JS جيداً قبل الانتقال للمكتبات الحديثة مثل React أو Next.js.
- اختار مسارك: - إذا كنت تميل للتصميم والتفاعل البصري: ابدأ بـ Frontend.
- إذا كنت تميل للمنطق ومعالجة البيانات: ابدأ بـ Backend.