Touch Typing (الكتابة العمياء)

شنو هي Touch Typing؟

ببساطة، هي مهارة الكتابة على الكيبورد باستخدام كل أصابعك العشرة بدون ما تباوع على الدكم. الفكرة إنك تبني "ذاكرة عضلية" (Muscle Memory) تخلي أصابعك تندل مكان الحروف وحدها، وعيونك تبقى مركزة عالشاشة 100%.

image of finger positions in touch typing

ليش لازم تتعلمها؟ (درس من تجربة واقعية)

الموضوع مو بس "شكليات" أو حتى تصير سريع، الموضوع يخص صحتك ومستقبلك كمبرمج.

1. الصحة (أهم نقطة)

أغلبنا نبدي نبرمج على لابتوب، مدنكين الركبة ونباوع للكيبورد وللشاشة بالتناوب. بعد 3 أو 4 سنوات، راح تبدي تعاني من آلام ركبة (Neck Pain) مزعجة جداً وممكن تأثر على استمراريتك. لما تتعلم Touch Typing وتجيب شاشة خارجية (Monitor) بمستوى نظرك:

  • راسك راح يبقى مرفوع.
  • ضهرك عدل.
  • عيونك مرتاحة.

2. التركيز (Flow State)

من تباوع للكيبورد، عقلك يفصل من "التفكير بالكود" حتى يروح يدور حرف P أو {. بالـ Touch Typing، هالحاجز يختفي. إيدك تكتب اللي تفكر بيه مباشرة بدون أي جهد ذهني.

مرحلة "العذاب" (أول شهر)

لازم نكون واقعيين، تعلم هاي المهارة يحتاج سبب قوي (Why) و تدريب (Training).

  • الأسبوع الأول: راح يكون "عذاب". راح تحس نفسك مشلول، وتكتب أبطأ بهواية من طريقتك القديمة. كتابة كلمة وحدة ممكن تاخذ منك دقيقة حتى تلكى الحروف وانت مغمض.
  • الاستمرار: اذا عندك دافع (مثل ألم الركبة) وتستمر بالتدريب يومياً، ورا شهر واحد بس راح تشوف العجب.
  • النتيجة: راح توصل لسرعة 40-50 كلمة بالدقيقة (WPM) بس براحة تامة وبدون ما تباوع.

القاعدة الذهبية: الدقة > السرعة

أكبر غلطة يسويها المبتدئ هي محاولة الكتابة بسرعة من البداية. ركز على الدقة (Accuracy) فقط.

  • اذا الكلمة تاخذ دقيقة كتابة، خليها تاخذ دقيقة. المهم تكتبها صح وبدون ما تباوع.
  • السرعة هي "تحصيل حاصل". لما تحفظ أماكن الحروف صح وتكتب بدقة عالية، السرعة راح تجي وحدها تدريجياً.
  • اذا حاولت تسرع وانت تغلط، راح تبني "ذاكرة عضلية غلط" وتصحيحها اصعب بهواية.

منين أبدي؟

1. وضعية الأصابع (Home Row)

الأساس هو صف الارتكاز:

  • اليد اليسرى: A S D F
  • اليد اليمنى: J K L ;
  • الإبهامين: Space

تذكر دائماً: حرف F وحرف J بيهم بروز صغير، تلمسهم حتى ترجع لمكانك اذا ضعت.

2. مصادر التدريب

  • TypingClub: الأفضل للبداية، يعلمك مكان كل اصبع.
  • Keybr: ذكي جداً، يخليك تعيد الحروف اللي تغلط بيها.
  • Monkeytype: لقياس السرعة والتدريب المستمر (بعد ما تضبط الأساسيات).

نصيحة أخيرة

البرمجة علمتنا إن كلشي بالدنيا يجي بالتدريب. خصص 15 دقيقة يومياً لتعلم الـ Touch Typing، ورا شهر راح تشكر نفسك لأن خلصت من وجع الركبة وزادت إنتاجيتك أضعاف.